Waandishi habari wa kigeni wakamatwa Burundi

Polisi nchini Burundi wamewakamata waandishi habari wawili raia wa Uingereza na Ufaransa katika msako uliofanyika kuwasaka waasi katika mji mkuu, Bujumbura.

Maafisa wa usalama wametangaza Ijumaa kuwa waandishi habari hao ni Phil Moore wa Uingereza na Jean Philippe Remy wa Ufaransa na kwamba wamekamatwa katika msako uliofanyika katika mitaa ya Jabe na Nyakabiga jijini Bujumbura. Naibu Msemaji wa Polisi ya Burundi Moise Nkurunziza amesema mwandishi habari Mfaransa alikamatwa alipofika kituo cha polisi kuuliza kuhusu hali ya mwenzake Muingereza aliyekuwa ameshakamatwa.(VICTOR)

Gazeti la Le Monde la Ufaransa limetoa taarifa likitaka waandishi hao waachiliwe na kusema walikuwa ni maripota wake maalumu nchini Burundi. Hayo yanajiri masaa machache baada ya Shirika la Haki za Binadamu la Amnesty International (AI) kutangaza kuwa, picha za satalaiti zinaonyesha uwezekano wa kuweko makaburi matano ya umati katika eneo la Buringa kaskazini mwa mji mkuu wa Burundi, Bujumbura.

Machafuko yaliikumba Burundi tangu mwezi Aprili mwaka uliopita baada ya Rais Nkurunziza kuteuliwa na chama chake cha CNDD-FDD kuwania tena urais kwa mara ya tatu. Wapinzani walisema suala hilo ni kinyume cha katiba ya nchi na makubaliano ya amani ya Arusha. Takribani watu 400 wamepoteza maisha katika machafuko hayo huku makumi ya maelfu ya wengine wakiwa wakimbizi.CHANZO:IRB SWAHILI

Share this: