Baadhi ya maswali yaliyoulizwa na wabunge Bungeni mjini Dodoma

Michango ya wabunge katika kuijadili hotuba ya Rais JPM

SERIKALI imeshauriwa kuwasilisha Bungeni sheria zote zinazokinzana na kasi ya Rais Dk. John Magufuli ya kufanya mabadiliko ya haraka ya kiutendaji, hapa nchini.

Mbunge wa Nzega Mjini (CCM), Hussein Bashe, alisema hayo jana, Bungeni mjini hapa, wakati akichangia hotuba ya rais.

Alisema kuna malalamiko mbalimbali kuwa kasi ya rais, inayofanyika hivi sasa, imekuwa ikipingana na baadhi ya sheria za nchi.

Bashe alisema baadhi ya sheria, zilizopo hivi sasa zimekuwa ni kichaka kikubwa cha wezi wanaoliibia taifa.

Alisema sheria kama ya manunuzi ni sheria ambayo imekuwa ikitoa mwanya kwa watumishi kuibia nchi.

“Utaona kuwa kwa kutumia sheria hiyo, choo kina jengwa kwa sh. milioni 20, kwa kutumia sheria hii ya manunuzi kupitia makandarasi wakati choo hicho hata milioni tano hakifiki,’’ alisema.

Kwa mujibu wa mbunge huyo, kunahitajika kiongozi kama Rais Magufuli katika kufanya maamuzi sahihi ili jamii iweze kuondoka hapa ilipo na kupiga hatua.

“Watu wanahoji eti kwanini serikali imetoa fedha na kupeleka mashuleni bila kupitia bajeti ndogo sasa ulitaka watoto wetu wasiende shule,’’ alisema.

Aliongeza kuwa “Tunahitaji rais wa aina hii, kwa sasa akanyage sheria ili mambo yaende na kama zipo sharia mbovu basi ziletwe hapa tuzifute,’’ alisema.

Aidha mbunge huyo, aliiomba Wizara ya Fedha na Mipango, kuhakikisha inatenga fedha za kutosha kwa ajili ya ujenzi wa reli kwa ukubwa wa (Standard Gauge).

Alisema reli ni moja ya njia muhimu ya kusafirisha mizigo mbalimbali ikiwemo hata ya nje ya nchi.

Kwa upande wake, Dk.Pudensiana Kikwembe (Kavuu-CCM), alisema suala la elimu bure ni muhimu likatolewa ufafanuzi zaidi kwa sasa.

Alisema kumekuwa na sitofahamu miongoni mwa watendaji wanaotekeleza sera hiyo kwani bado kuna changamoto nyingi.

“Nawaomba walimu wakuu kutumia fedha hizo kwa minajili iliyokusudiwa na si vinginevyo,” alisema.

Naye, Agustine Masele (Mbogwe-CCM) aliwataka Watanzania kumuombea Rais Magufuli kwa kazi nzito anayoifanya ya kutumbua majipu.

Alisema hivi sasa taswira ya nchi imeanza kuonekana kutokana na majipu kutumbuliwa kila kukicha.

Akizungumzia viwanda, mbunge huyo alisema ni muhimu viwanda vikafufuliwa ili kuongea ajira kwa wananchi walio wengi.

Wizara ya Maliasili na Utalii

WIZARA ya Maliasili na Utalii na Wizara ya Ardhi imeandaa mpango wa kupima maeneo yote ambayo yana migogoro baina ya wananchi na hifadhi nchi nzima katika kipindi cha mwaka 2015/ 16

Kauli hiyo ilitolewa bungeni mjini hapa jana na Waziri wa Maliasili na Utalii, Profesa Jumanne Magembe wakati akijibu swali la nyongeza la Mbunge wa Vitimaalum, Ferister Bula(CCM),aliyetaka kujua ni lini serikali itamaliza mgogoro huo utamalizika kati ya wananchi na hifadhi ya Mkongonelo iliyoko wilayani Kondoa mkoani Dodoma.

“Hifadhi ya Mkongonelo, wananchi wameuwawa na askari wameuwawa, pale wananchi wanaomba kilomita 50 tu ili mgogoro uishe lakini bado ni tatizo mpaka leo,” alisema.

Katika swali la msingi Mbunge wa Vitimaalum, Cecilia Paresso(Chadema),alitaka kujua ni lini matokeo ya kamati ya ndogo iliuoundwa na aliyekuwa waziri wa maliasili na utalii, kwa ajili ya kushughulikia mgogoro uliopokati ya wananchi na hifadhi wa kata ya Bunger na hifadhi ya Taifa ya Manyara.

Pia alitaka kujua ni lini wananchi watapewa taarifa ya kamati hiyo.

Akijibu Naibu Waziri wa Maliasili na utalii, Ramo Makani, alisema taarifa ya Tume imebaini kuwa , kwa ujumla chanzo kikubwa cha mogogoro baina ya wananchi na Hifadhi ya Taifa ya Ziwa Manyara.

“Ni idadi kubwa ya mifugo na kukosekana eneo la kuchungia katika kijiji cha Buger, Tume imependekeza hatua mbalimbali za kuchukuliwa,” alisema

Alizitaja hatua hizo kuwa ni pamoja na za kuchukuliwa ambazo ni pamoja na kufanya sense ya mifugo kwa vijiji vilivyopo katika kata ya Buger ili kubaini idadi ya mifugo iliyoko dhidi ya ukubwa wa ardhi waliyonayo.

Nyingine ni Vijiji kuandaa mpango wa matumizi bora ya ardhi, kutoa elimu ya uhifadhi na sheria katika vijini na kuimarisha zilizopo ili kutelekeza vema majukumu yake.

Aliitaja hatua nyingine kuwa ni TANAPA kuweka nguvu kuchangia miradi ya maendeleo ya maendeleo ya jamii kwenye vijiji vinavyozunguka hifadhi.

Naibu Waziri huyo Wizara itaandaa kikao cha wadau ndani ya miezi mitatu ili kuwasilisha mapendekezo ya kamati na kujadili utekelezaji wake.

Tamisemi

SERIKALI imesema bado haijakamilisha mchakato wa kuanzishwa mkoa wa Songwe haujakamilika kwa kuwa bado hawajatoa tangazo maalum kwenye gazeti la serikali.

Waziri wa Nchi Ofisi ya Rais-TAMISEMI, George Simbachawene, aliliambia bunge mjini hapa jana wakati akijibu swali la nyongeza la Mbunge wa Mombo, David Silinde(Chadema), aliyetaka kujua kwanini serikali inakuwa na kigugumizi katika kufanikisha uanzishwaji wa mkoa wa Mombo.

Waziri huyo alimtaka mbunge kuvuta subira wakati ukifika watakapokamilisha mchakato wote watatoa tangazo maalum la Rais kuanzisha mkoa mpya wa Mombo.

Aidha Serikali, imetenga Sh. milioni 282.7 kwa ajili kuendeleza ujenzi wa nyuma hizo na Sh. milioni 200.0 zimetengwa kuanza ujenzi wa Ofisi ya Mkuu ya mkuu wa Wilaya.

Hayo yalieleze bungeni mjini hapa jana na Waziri wa Nchi Ofisi ya Rais –TAMISEMI, Seleman Jaffo, wakati akijibu swali la msingi la Silinde,(Chadema).

Katika swali lake Mbunge huyo, alitaka kujua ni kwa nini serikali imekuwa ikisuasua kautoa fedha ili ziweze kujenga Ofisi na Nyumba za watumishi katika makao makuu ya wilaya Mombo eneo la chitete.

Jaffo alisema serikali katika mwaka wa fedha 2013/24 ilifanikiwa kupeleka Sh. milioni 250.0 ambazo zimetumika kuanzia ujenzi wa nyumba ya mkuu wa wilaya katika mwaka wa fedha 2014/15 fedha zilizotengwa kwa kazi hizo hakupelekwa.

Alisema kwa upande wa ujenzi wa Ofisi za halmashauri ya wilaya ya Momba, serikali katika mwaka 2014/15 ilitoa Sh. milioni 450 kwa ajili ya kuanza ujenzi wa ofisi hizo.

“Katika jitihada ya kuhakikisha halmashauri inawapatia watumishi wake nyumba bora, serikali imezielekeza halmashauri kutumia mapato ya ndani kwa ajili ya ujenzi wa nyumba za watumishi.

Wizara ya mambo ya nje, ushirikiano wa Afrika Mashariki, kikanda na kimataifa

WAZIRI wa Mambo ya Nje, Ushirikiano wa Afrika Mashariki, Kikanda na Kimataifa Harson Mwakyembe amesema serikali haina taarifa za kuwepo kwa watanzania wanaofanya biashara nje ya nchi ambao walipata matatizo nchini Kenya na kukosa msaada kutoka ubalozi na wizarani.

Aidha alimtaka, mbunge kupeleka taarifa katika wizara hiyo kama kweli kuna taarifa hizo mana ni nzito ili ziweze kufanyiwa kazi.

Mwakyembe, alikuwa ajibu swali la nyongeza la Mbunge wa Micheweni, Haji Khatibu Kai(CUF), aliyetaka kujua ni kwanini watanzania zaidi ya 100 wa jimbo la Kai walipopata matatizo nchini Kenya hawakupatiwa msaada licha ya kutoa taarifa ubalozi na wizarani.

Aidha, Waziri huyo licha ya kukiri kutokuwa na taarifa hizo na kumtaka mbunge kuwapelekea kwa maandishi, alitoa wito kwa wananchi wa Tanzania wanaofanya biashara nje ya Nchi kutoa taarifa ubalozi ili wanapopawa na matatizo ili wapatiwe msaada wa haraka.

Katika swali la msingi mbunge huyo alitaka kujua, serikali inawashauri nini wananchi wake wanaokwenda kibiashara kwenye nchi zinazounda umoja wa Afrika Mashariki.

Pia alitaka kujua wananchi hao wanapaswa kupeleka malalamiko yao wapi pindi wanapopata matatizo au vikwazo wawapo nje ya nchi.

Akijibu swali hilo, Naibu Waziri wa Waziri wa Mambo ya Nje, Ushirikiano wa Afrika Mashariki, Kikanda na Kimataifa, Dk. Suzan Kolimba, alisema nchi wanachama wa Jumuiya ya Afrika Mashariki zimeondolewa ushuru wa forodha mipakani.

Dk.Suzan alisema, hatua hiyo inapanua soko la bidhaa za Tanzania kufikia wanaafrika Mashariki takribani milioni 143 katika nchi tano wanachama wa Jumuiya za Tanzania, Kenya, Uganda, Rwanda na Burudan.

“Ni dhahiri kuwa endapo soko hilo litatumika kikamilifu litachangia kwa kiasi kikubwa kukuza uchumi wa Taifa na kupunguza umaskini wa wananchi wetu,” alisema.

Alisema, serikali inawashauri wananchi kuzichangamkia fursa za kibiashara, ajira, uwekezaji zitokanazo na Jumuiya ya Afrika Mashariki katika kujiharakishia maendeleo.

Mwisho